قبل ما أنام يوم 16 مارس 2010

النهاردة كان يوم حلو أوي من كتر حلاوته كأنه حلم مكناش مصدقين ده فعلا بيحصل وللا بيتهيألنا
مع ان كان بدايته نكد من امبارح ، لكن اللي بيحب ميقدرش لايزعل اللي بيحبه ولا يزعل منه عشان الحب كفيل انه يزيل اي زعل من بينهم

زي ما قلت النهادرة كان حلم، وعشان كدة قررنا اننا نرضي ربنا ومنزعلوش مننا ونصحى من الحلم ده. فعملنا اتفاق أننا نقف عند هذا الحد ومنغضبش ربنا مننا تاني ومنعملش أي حاجة غلط

أنا مستغربة من نفسي جدا التلات تيام اللي فاتو ، عمري ماعملت كدة ولا اتصرفت كدة ، أكيد مومو بيعمل شوية فودو وبيمارس اساليبه في السحر الأسود عليا :)

انا مش عارفة انا هستحمل ازاي ولا مومو هيستحمل ازاي
لكن احنا بنعمل ده عشانك يارب ترضى علينا وتغفرلنا ، ممكن أكون بكتب الكلام ده وأنا بدمع وفعلا خايفة اني مقدرش انفذ الاتفاق ده، أو انفذه أنا ومومو لكن بألم وعذاب، لكن يارب أملنا فيك كبير، انت عارف أد ايه احنا بنحب بعض ، وأد ايه ماصدقنا نلاقي بعض وأد ايه كل واحد فينا بيتمنى التاني  لكن أحنا بنضحي بكل ده ياربي عشان ترضى عننا ومتغضبش علينا وتبارك لنا

فيارب أملنا فيك كبير انك تكرمنا وتعيننا وتوفقنا لما فيه الخير وتدلنا دايما على الخير

يارب تقبلنا وتب علينا واغفر لنا ووفقنا لما فيه الخير

وصلى الله على سيدنا محمد وعلى آله وصحبه وسلم

منو
12:10 مساء 16 مارس 2010