انت بتهددني ياض انت ياض وللا ايه

لااااااااااااااااااااااااااااااااااااااااا
احنا مبنجيش بالتهديد
كان ممكن تقولي وحشتيني ، نفسي تكتبيلي ، قوليلي انتِ حاسة بايه
وكان ممكن تكتبلي رسالة جامدة أوي أوي يغمي علي لما أقراها ولما أفوق أكتبلك الرد عليها

احنا وصلنا الساعة 12 ويادوب الولاد نامو كلمتك على أم نبيل كان مقفول وكلمتك على فودافون مردتش

النهاردة كلنا تعبنا أوي لكن الحمد لله

انت فين وعملت ايه طمني عليك - احتمال تكون نايم؟ لكن لأ انا حاسة انك عند حمد

أنا الفترة دي بمر بمشاعر غريبة أول مرة بحس بيها

حب وخوف

لأول مرة بحس بالخوف - أنا بكره الشعور بالخوف وبحب الطمأنينة
خايفة انك ترجع وحش تاني وتبهدلني تاني وتبيع وتشتري فيا وميهمكش حاجة
كان الأول لو حد قالي انك ممكن تسيبني لا يمكن أصدقه وكنت واثقة فيك لأبعد حدود
لكن دلوقتي أنا خايفة
خايفة عشان شفت ده بعيني ، شفت أد ايه انت ممكن تبقى قاسي
أنا حبيت فيك الحنية ورجولتك وشهامتك وانك حاميني
حبيت فيك خفة دمك وقفشاتك
حبيت لمساتك وحضنك واحتوائك ليا
حبيت اني وأنا معاك ببقى مطمنة وحاسة أن الدنيا كلها معايا ومش ناقصني حاجة
حبيت احساسي اني بنتمي ليك واني جزء منك واننا الاتنين شخص واحد .. نفس واحد وقلب واحد
انك لما تحس بحاجة أنا بحس بيك وانك كمان تحس بيا

كل ده انت اخدته مني لما بعدت عني
كنت زي السمكة اللي طلعوها من المحيط ورموها على صخر صلب في عز الشمس، تتلوى وتتخنق وتتخبط في الأرض ولا حد حاسس بيها
انت بالنسبة لي كنت المحيط، عايشة بيك وجواك ، المحيط طلعني من جواه ورماني
أشبه بانسلاخ روح من روح، لحظة ميلاد أو لحظة موت لما الواحد يلاقي نفسه أدام الحقايق المجردة للدنيا
غدر خيانة قسو ظلم
أنا فقدت بوصلتي الداخلية
ايه هي الاتجاهات
ايه القرار الصح وايه القرار الغلط

أنا معدتش حمل أي صدمات في حياتي - معدتش قادرة

انت ممكن تبيعني تاني؟
ممكن تتخلى عني وأنا في أشد احتياجي ليك؟
هل هتقدر حبي ليك وللا هتبيع وتشتري فيا وتعذبني؟

(ياريت تكون الاجابة نموذجية ولا تقل عن 20 صفحة فلوسكاب)