لّا إِلَهَ إِلاَّ أَنتَ سُبْحَانَكَ إِنِّي كُنتُ مِنَ الظَّالِمِينَ

قال الله تعالى - "وَذَا النُّونِ إِذ ذَّهَبَ مُغَاضِبًا فَظَنَّ أَن لَّن نَّقْدِرَ عَلَيْهِ فَنَادَى فِي الظُّلُمَاتِ أَن لّا إِلَهَ إِلاَّ أَنتَ سُبْحَانَكَ إِنِّي كُنتُ مِنَ الظَّالِمِينَ فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنجِي الْمُؤْمِنِينَ "

أملي في ربنا كبير ان ربنا يسامحنا ويغفر لنا ويرضى علينا ويفرج علينا الكرب اللي احنا فيه

امبارح يوم غريب فعلا ... في رأي أي حد ان كل ده غلط - حرام - زبالة ... لكن كل الناس دي معندهاش لا قلب منو ولا قلب مومو ولا مشاعر أي حد فيهم ... أنا امبارح مكنتش عايزة أكتر من كدة ... اللي احنا كنا فيه كان أكتر من أحلامي بكتير... أنا في حضن مومو وهو في حضني ... عايزين ايه أكتر من كدة ... هو فيه أصلا أكتر من كدة ؟؟؟ دي أقصى أحلامي ومعنديش حلم أكتر من كدة غير اننا نفضل حاضنين بعض على طول...


أنا دلوقتي بشم ريحة مومو كتير وأنا قاعدة لوحدي ... وبحس بنفس الاحساس وهو حاضني ... احساس جميل من الراحة والطمأنينة واننا بتاعته وهو بتاعي ... اننا شخص واحد ... بني آدم واحد ... كائن واحد


عشان احنا عندنا ضمير وبنخاف من ربنا قررنا اننا نضحي بكل ده عشان اتنين ملهمش ذنب في حاجة ... لو عرفوا احنا بنضحي بايه عشان خاطرهم هل يا ترى هيقدروا ده ؟؟؟ أنا ومومو كل واحد فينا بيضحي بحياته وبقلبه عشان نريح ضميرنا ونحس ان  ربنا راضي عننا واننا مظلمناش حد


مش معنى التضحية دي اننا هنبطل نحب بعض ، لأ - معناها ان كل واحد هيحط حبه ومشاعره واحاسيسه في قلبه ويقفل عليها ... الصعوبة الحقيقية اننا بعد مابقينا واحد ازاي نرجع تاني اتنين؟


مومو ... حبيبي ... أوعى تزعلني أو تجرحني لأي سبب من الأسباب ... أنا بحبك وحبك اللي في قلبي ده أنا مقدرش اعمله replacememt  زي ما انت طلبت مني ... عشان الموضوع ده أكبر من احتمالي وقدرتي ... اللي اقدر أعمله هو اني أحاول ... عشان الأولاد بس ... وحبي ليك ده هو اللي هيخليني أقدر استحمل وأقاوم  ... أنا حطيت الحب ده جوة قلبي في خزنة مصفحة مفتاحها معاك انت بس ... حافظ عليه وأوعى تضيعه


بحبك ... أملي في ربنا كبير ... ادعيلي


منو